رنگ برنگے محلاں کول، کھلون دا فائدہ کوئی نہیں

رنگ برنگے محلاں کول، کھلون دا فائدہ کوئی نہیں
اڈّیاں چُکّ کے ایویں وڈیاں، ہون دا فائدہ کوئی نہیں

جیہڑی شے دی مرداں وانگوں، راکھی کر نہیں سکدا توں
اوہدے لئی ہُن بڈِھیاں وانگوں، رون دا فائدہ کوئی نہیں

گلّیں باتیں بھکھّ نہیں مردی، کال نہیں کٹے جاندے
مٹی آٹے رنگی کرکے، گون دا فائدہ کوئی نہیں

پتا نہیں سی اک دوجے دے، بن جاواں گے ویری وی
ایہہ تے پتا سی وکھو وکھی، ہون دا فائدہ کوئی نہیں

چنگے حاکم بنے نہیں جیکر، بنوں رعایا چنگی
ہر چنگیائی اپنے ہتھوں، کھون دا فائدہ کوئی نہیں

قدسی جیہڑے آپ نا بولن، غزلاں نظماں اندر
اوہناں حرفاں تے لفظاں دی، چون دا فائدہ کوئی نہیں