اِک ہور گلاس بناؤ
اِک سگرٹ ہور لواؤ
ایہہ دنیا کدے دی کوجھی اے
ایہہ کدے وی ہونی سوہنی نہیں
جو کدے وی ساڈی ہو نہ سکی
او کدے وی ساڈی ہونی نہیں
اِک ہور گلاس بناؤ
اِک سگرٹ ہور لواؤ
اس زُلف دا رونا کیہ رونا
جو ہور کِسے دے لیکھ پئی
اِنج لگدا سی مر جاواں گے
نہ مرے قیامت ویکھ لئی
اک ہور گلاس بناؤ
اک سگرٹ ہور لواؤ
سب عقل تعلیماں پانی نیں
تے جہد جفل بیکار ہوئے
اساں چانن ڈھونڈن نکلے ساں
تے چِکڑ گل دا ہار ہوئے
اِک ہور گلاس بناؤ
اِک سگرٹ ہور لواؤ
سر دھڑ دیاں بازیاں ہاریاں نیں
پر ہار کولوں اسیں ہردے نہیں
سانوں زندگی زندگی دے نہ سکی
پر موت کولوں اسیں مَردے نہیں
اِک ہور گلاس بناؤ
اِک سگرٹ ہور لواؤ
حوالہ: اک دروازہ؛ سانجھ؛ صفحہ 46 ( ویکھو )
