جِندے نی

جندے نی! تُوں کیکن جمّی
پیر پیر تے نِت بکھیڑے
جیون دی راہ لمّی
جندے نی! تُوں کیکن جمّی

جندے نی! کیہ لچھن تیرے
پھنیئر نال یرانے وی نیں
جوگی ول وی پھیرے
جندے نی! کیہ لچھن تیرے

جندے نی! کیہ ساک سہیڑے
اِک بُکل وچ رانجھن ماہی
دُوجی دے وچ کھیڑے
جندے نی! کیہ ساک سہیڑے

جندے نی ! کیہ کارے کیتے
آپے آس دے چولے پاڑے
آپے بہہ کے سیتے!
جندے نی ! کیہ کارے کیتے

جندے نی! تک چیت وساکھاں
تُوں پھردی ایں میل کُچیلی
دس! تینوں کیہ آکھاں؟
جندے نی! تک چیت وساکھاں

جندے نی! تینوں کیہڑا دسّے
لُوں لُوں تیرا عیباں بھریا
موت وٹیندی رسّے
جندے نی! تینوں کیہڑا دسّے

جندے نی! تیرے ساہ نکارے
موئے مونہہ نال آ بیٹھی ایں
جیون دے دربارے
جندے نی! تیرے ساہ نکارے

جندے نی! کیہ اَتّاں چائیاں
ہس کھیڈن دی ویلھ نہ تینوں
کردی پھریں لڑائیاں
جندے نی! کیہ اَتّاں چائیاں

جندے نی! کیہ ویلے آئے
اِک دوجے دی جان دے وَیری
اِکّو ماں دے جائے
جندے نی! کیہ ویلے آئے

جندے نی! تیرے جِیوَن ماپے
آپے ہتھیں ڈولی چاڑھن
آپے کرن سیاپے
جندے نی! تیرے جِیوَن ماپے

جندے نی! کِس ٹونے کیتے
دِل دریا تے نین سمندر
روون بیٹھے چُپ چپیتے
جندے نی! کِس ٹونے کیتے

حوالہ: نال سجن دے رہیے، افضل ساحر؛ سانجھ لاہور 2011؛ صفحہ 16