نرم کالجہ ڈول گیا!

سُفنے وچ آکے اَڑیو نی
کوئی شرماں دے گُھنڈ کھول گیا
میرا نرم کالجہ ڈول گیا

خَورے اوہ کون اے، کیہڑا اے
جدے چَن جَیہے مُکھ دے چانن نال
لَٹ لَٹ پیا کردا ویہڑا اے
سَدھراں وچ سوچاں گھول گیا
میرا نرم کالجہ ڈول گیا

میرے ساہواں دے وچ وَس دا اے
میری پلکاں دا کجرا سیّو
میری باہواں دا گجرا سیّو
میرے لُوں لُوں دے وچ ہَس دا اے
پر ، ناں ، تھاں کُجھ نہ دس دا اے
میرے اَنگ اَنگ نوں ٹٹول گیا
میرا نرم کالجہ ڈول گیا

کدی والِیں گُنجھلاں پاواں میں
کدی ونگاں پئی چھنکاواں میں
کدی کال کلوٹیاں کانواں نوں
کُٹ کُٹ کے چُوریاں پاواں میں
راہوں نال ہوگئی راہوں میں
بِن ویکھیوں چاکھیوں رول گیا
میرا نرم کالجہ ڈول گیا

اج ترنجنِیں جی نئیں لگدا اے
اج دِل وچ تُونبا وج دا اے
پیاراں دا بھانبڑ جَگ دا اے
اوہدے باہجوں کُجھ نئیں سج دا اے
جیہڑا ساڈیاں نینداں کَھسّن لئی
چُپ چاپ آیا تے اڈول گیا
میرا نرم کالجہ ڈول گیا