داس کیپیٹل

ماواں تے دھیاں ہن رل کے نہیں بہندیاں
اوہناں دے راہ وکھرے ہو گئے نیں
زخم جدوں شعور بن جاندا اے
شکست چوں اک وار فیر اُٹھدی اے حیاتی

تے اک نظم
میرے ہونٹھاں تے سسکاریاں بھر دی اے
مصرعے پنڈے تے نیل وانگر اُبھر دے نیں

کُڑیاں دی پیڑ اینی اے کہ شاعری لہو وچ ڈُب جاندی اے
اک پُھل ، اک جھنڈا، اک تارہ
پر اوہ کُڑی اجے نہیں لڑ سکے گی
اوہ بغاوت نوں اک پیار گیت وانگر گا سکدی اے
ہن چوری وانگر ہونٹھاں وچ گنگناندی اے
تے ڈر جاندی اے

آپ اپنی ادھی جرات توں
عشق تے انقلاب دی چون غیر جذباتی فیصلہ ہونا چاہیدا اے
انقلابی دی جرات وانگر
پوری جرات وانگر
اپنے ہنجواں وچ بندوق تے دل نال نال بیجن وانگر
فیر کوئی کُڑی خود کشی نہیں کرے گی

تے کسے جنور نال نہیں بنھی جاوے گی
صرف پنڈے دے نیل نوں
داس کیپیٹل دیاں سطراں وانگ جین دی لوڑ اے
تے لوڑ اے
ہنجواں چوں وی دنیا دا صاف منظر ویکھن دی

تے انکار دا حرف بولن دی
ماں تے خدا دے سامنے
گولی تے دل دے وچکار