آ پیار کریئے
پُھلاں نوں
ماں دیاں ددھل چھاتیاں نوں
کہ بندے دی حیاتی، ایہناں چشمیاں دے رس نال جڑی ہوئی
کولیاں جوان بانہواں نوں
بال دے کولے ریشم ہتھاں نوں
کنک دے جوان سٹیاں نوں
آ پیار کریئے
تھاں تھاں پاٹی ہوئی، لوسی ہوئی، ونڈی ہوئی دھرتی نوں
امن دی کتاب نوں
جیہڑی ورقہ ورقہ ادھڑ دی پئی
ناری دے ساگر پنڈے نوں
وراگ نوں، راگ نوں
سمندر دے جھل پنے نوں
سچ دے کالے چہرے نوں
ہونٹھاں دے پاٹے کاگت نوں
قلم دی تکھی مسکان نوں
اوہنوں موت دی سزا سنائی گئی اے
تے اوہ اپنی سجری کِوتا گنگنا رہیا
گا رہیا، گائی جا رہیا۔۔۔۔۔۔۔۔
(1969)
حوالہ: اِک اُدھڑی کتاب دے ورقے؛ سنگ میل پبلی کیشنز