اسماناں تکّ پہنچیا اک آوازا اے

اسماناں تکّ پہنچیا اک آوازا اے
دھرتی دے مکھڑے تے جُھوٹھا غازہ اے

سجناں دی بو آوے مِریاں زخماں 'چوں
منہ تے سچ بولن دا ایہہ خمیازہ اے

ایہہ رستہ وی جنگل دے ولّ جاوے گا
رُکھاں اُتوں لایا میں اندازہ اے

باہر کھڑا اے لشکر زخمی لوکاں دا
ہسپتال دا اِکو ہی دروازہ اے

نہر فرات تے ہُن وی پہرے لگے نے
سچائی دا خوف اَجے تکّ تازہ اے

اکبر کس دا ناں بُلھاں تے آیا ای
درد پرایا مڑ کیوں ہویا تازہ اے