جھلا ریت وچ راہواں لبھدا پھردا سی
سورج توں پرچھاواں لبھدا پھردا سی
خورے ساری دنیاں لوہنی چاہندا سی
لامبو تیز ہواواں لبھدا پھردا سی
نیہری رات دا پاندھی منزل پجن لئی
تارا ٹاواں ٹاواں لبھدا پھردا سی
سنیے اوہدے ساہ وی پتھر ہو گئے نیں
جیہڑا چنّ تے تھاواں لبھدا پھردا سی
دُھپاں ناویں لا کے نازک جیون نوں
لوکاں دے لئی چھاواں لبھدا پھردا سی
جیہدے کولوں روگ ملے سن عمراں دے
اوسے کول دواواں لبھدا پھردا سی
