اوہ نیہرے دا جادو اک دن ٹُٹے گا
میرے جثے وچوں سورج پُھٹے گا
ہُن تے ساہ وی ٹاواں ٹاواں آؤندا اے
روح دا پنچھی پنجرے وچوں چھٹے گا
رسماں دے اس بھرویں بھرویں میلے چوں
سوچ ریہا واں کیہڑا جھنڈی پُٹے گا
چڑھیا پھردا ایں توں تختاں تاجاں تے
اک دن ویلا تینوں ہیٹھاں سُٹے گا
غم دی جنج چڑھی اے باجے گاجے نال
کیہڑا پلکاں اتوں ہیرے لُٹے گا
میں جیہنوں پروازاں دتیاں انت دیاں
پتا نہیں سی مینوں امبروں سُٹے گا
میں گل گھوٹو دتے جسراں سدھراں نوں
میرے وانگوں کیہڑا ساہواں پُٹے گا
راہ اکلاپے دا میں اکرم چھوہیا اے
رستہ آپے مینوں ویکھ کے ہُٹے گا
