اپنی گھمن گھیری توں ہی ویلھ نہیں لبھدی اس چلتر نھیری توں ہی ویلھ نہیں لبھدی کجھ وی ہور نہیں ویکھن دیندا ایہہ لشکارا سانوں تکنی تیری توں ہی ویلھ نہیں لبھدی تیرا جوبن سرو جیہا میں کیکن ویکھاں اوس بچپن دی بیری توں ہی ویلھ نہیں لبھدی دوجے ریشمی تھان تے اکھیاں تلھکن کیویں اک چانن دی ڈھیری توں ہی ویلھ نہیں لبھدی تینوں کیویں آپنے دل دا حال سناواں تیری دید دلیری توں ہی ویلھ نہیں لبھدی ایہہ جُثّے دے کھیکھن مینوں جین نہیں دیندے اس مٹی دی ڈھیری توں ہی ویلھ نہیں لبھدی لگدا اے ساڈا کٹھیاں کوئی مستقبل ہی نہیں سانوں تیری میری توں ہی ویلھ نہیں لبھدی دل وچ لہہ کے دل نال دل دی گل کرے کیہ اکھ نوں فکر اُچیری توں ہی ویلھ نہیں لبھدی اک دوجے دے من دی بُھکھ نوں کیہ سمجھاں گے سانوں تن دی سیری توں ہی ویلھ نہیں لبھدی
