لعل

(بریٹیش لائبریری لندن وچ
غدر لہر دیاں مسلاں واچدیاں)

جوگی بیٹھا مٹی پھولے
ایہہ جاندیاں وی
نہیں لبھنے لال گواچے
صدی پرانی کِنیاں پُشتاں
لیکھے لگیاں
تقدیر نہ بدلی لوکاں دی

پھولے کاغذ دھکھدے اکھر
لعل ماتا دے زنجیراں نوں کٹنے نوں
پھردے دیس دیسانتر پیش نہ جاندی
توڑ کے موہ دے سنگل
تر پئے جنگل رستے
ملکو ملک شہر توں شہر

رتن سنگھ سنتوکھ ستنتر
دادا میر قربان الٰہی
رام کرشن رُڑھیا جاندا آمو دریا اندر

نہ کاغذ نہ اکھر دسدے
بے وطنے دا دل کِنج دھڑکدا
کِنج تڑپھدا چیتے کرکے
ماپے پنڈ تے بیلی

کون بھتیجا تانگھ ملن دی لے کے پھانسی چڑھیا
رہندا ستّ سمندراں پار ہے چاچا
تصویر دے پچھے نہرو لکھیا
ایہہ مورت اس اچے دا سچا پرچھاواں ہے
وطن دی دھرتی اتے پیندا

مورت اندر سنگھ اجیت
بنیا بیٹھا حسن خان ایران دا واسی
کدی تاں بولے فارس ترکی کدے سپینی
پر تکدی اکھ پنجابی ہے

نہرو سرکارے دربارے کہندا
اسنوں اپنے گھر جان دا
ماں دے پیریں پے کے مر جان دا حق تاں دیوو

نہ کاغذ نہ اکھر دسدے
کیہڑا خیال سی جیہڑا ہردم نال اوسدے رہندا سی
کسدے نام سہارے اوہ درد ہجر دا سہندا سی

جوگی بیٹھا مٹی پھولے
ایہہ جاندیاں وی
نہیں لبھنے لعل گواچے
صدی پرانی کِنیاں پُشتاں لیکھے لگیاں
تقدیر نہ بدلی لوکاں دی