ہمشیر ہم سخن بھراوا
آپاں اکو ماں دے پتّ ہاں
اپنا کی ونڈیا ہے
آپاں کجھ نہیں ونڈنا
وطن دیاں رگاں چ وگدا پانی
روح وچ وسدی ماں دی بولی
پاکپتن ننکانہ تخت لاہوری
راوی کنڈھے نچدا پُورن
ستلج کنڈھے مچدا بھگتا
میاں میر دا سنگ بنیادی
آپ سوالی آپ ہی داتے
بھریاں اکھیں، خالی ہتھیں
کی رکھنا تے کی ونڈنا ہے
ہمشیر ہم سخن بھراوا
ونڈنا تاں ونڈنا کئی کجھ ونڈنا
کی کجھ ونڈنا
دکھ سکھ ونڈنا
دل دا لہو
نہیرے دے وچ جگدی جوتی
ونڈ کے چھکنا رزق حیاتی
علم کتاباں
قلم تے کاغذ سبھ نوں ونڈنا
ہمشیر ہم سخن بھراوا
آپاں اکو ماں دے پت ہاں
