شام پوے تے آجاندے نیں رل کے سارے دکھ

شام پوے تے آجاندے نیں رل کے سارے دکھ
مر جاندا تے کدھر جاندے درداں مارے دکھ

آپو آپنے ،، مرنے پرنے ، آپو آپنی بھکھ
کیہڑا اگ پرائی سیکے، کون سہارے دکھ

آساں ویہڑے اونتر جانا، انج دا بوٹا جمیا
سو سو اک اک ٹاہنی دے نال لین ھلارے دکھ

رب جانے کیوں سکھ نگری دے دونویں وارے نہیں
اک میں تے، اک میرے ورگے اوگنہارے دکھ

سولی چڑھ کے وی جہناں نیں لج انا دی پالی
اجکل انجم نوں نیں اوہ جان توں پیارے دکھ