ڈمّی

تُوں اِک ڈمّی-----
فیر وی تیرے پِنڈے اُتّے
ہر موسم دے وَن سَوَنّے لِیڑے
لِشک مریندیاں لِیڑیاں اُتّے رنگ برنگے بِیڑے

مَیں اِک بندہ -----
فیر وی میرے پِنڈے تائیں
کدی نہ جُڑیاں لِیراں
میرا حال فقیراں
میں کیہ دَسّاں؟
کِویں ہَنڈائے
ساون، ہاڑ، سیالے
لُوں لُوں اندر دَھسّ گئے میرے
لوواں، دُھپّاں، پالے

کدی تے ڈولے چَڑھدی میری کوئی رِیجھ نمانی
تیرے وانگوں شو کیساں دا
میں وی واسی ہوندا
تیرے ورگی، کرماں والی
میں اک ڈمّی ہندا