روٹی شوٹی کھا بیٹھے آں
لَسّی شسّی پی بیٹھے آں
حُقے دا کش لا بیٹھے آں
پُونجھ پانّجھ کے اَندروں باہروں
بھانڈے وی کھڑکا بیٹھے آں
سوچی پئے آں ہن کیہ کرئیے
ویکھ لَیّاں نیں سب اخباراں
سبھّے وَرقے تھل بَیٹھے آں
پڑھ بیٹھے آں سارے اَکّھر
سارے حَرف سُنا بیٹھے آں
سوچی پئے آں ہن کیہ کرئیے
کیسے کیسے اَسلحے بَن گئے
وَڈّے وَڈّے مَسلے بن گئے
وڈّے شہر وسا بیٹھے آں
سارا چین گنوا بیٹھے آں
سوچی پئے آں ہن کیہ کرئیے
رِزق، سیاست، عشق، کوِتّا
کُجھ وی خالص رہن نہ دتّا
ساری کھیڈ وَنجا بیٹھے آں
دُدّھ وچ سِرکہ پا بیٹھے آں
سوچی پئے آں ہن کیہ کرئیے
جی کردا سی ووٹاں پائیے
مارشل لا توں جان چُھڈائیے
ووٹاں شوٹاں پا بَیٹھے آں
ایہ جمہُوری رَولا رَپّا
کِنّے سال ہنڈا بَیٹھے آں
سوچی پئے آں ہن کِیہ کرئیے
سودا کوئی پُجدا ناہیں
کوئی رَستا سُجھدا ناہیں
رَستے دے وِچ آ بیٹھے آں
سوچی پئے آں ہُن کِیہ کرئیے
پپُّو یار تنگ نہ کر
حوالہ: ہُن کی کرئیے، انور مسعود؛ دوست پبلی کیشنز اسلام آباد؛ صفحہ 83 ( ویکھو )
