سجناں ساڈی رسم روایت ساڈا چُپ چُپ رہنا

سجناں ساڈی رسم روایت ساڈا چُپ چُپ رہنا
نئیں تے اساں فقیراں تینُوں کیہ کُجھ نئیں سی کہنا

رُکھّاں وَلّوں ہُن کوئی سَدّا آوے یا نہ آوے
دُھپّے مَیں دوپہر گزاری ہُن کیہ چھانویں بہنا

مَندا کِیتا حال دِلے دا تیری بے پَروائی
اوسے گھر دا وَیری ہویوں جیہڑے گھر وِچ رہنا

کِڈا سوہنا درس وفا دا دے گئی اے اِک سوہنی
کچّے ہون گھڑے تے ہوون آپوں پَکّیاں رہنا

اَپنیاں اَپنیاں اَکھیاں دے وِچ اَپنے اَپنے اَتھرو
میرے باہجوں پِیڑ مری نوں ہور کِسے نئیں سہنا

ایہو جیہے لشکیلے موتی کِسے کِسے نُوں جُڑدے
دَرد منداں نُوں مِلدا انور اَکھیاں دا ایہ گہنا