فیر چڑھیا فجر دا تارا، چِڑیاں بول پئیاں
فیر کُھلیا سُخن دوارا، چڑیاں بول پئیںاں
فیر دیہنہ دیاں رِشماں نویں سنہے لے آئیاں
فیر دھرت پیا لشکارا، چڑیاں بول پئیاں
فیر الھڑ کُڑیاں سُفنے چُنن نُوں ٹُر پئیاں
فیر چڑھیا پِینگھ ہُلارا، چڑیاں بول پئیاں
فیر ڈونگھے پانیاں سِر تے چدّر تان لئی
ہُن لبھسی کِویں کنارا، چڑیاں بول پئیاں
فیر کیدو بَن کے ہیر نوں پانیاں گھیر لیا
فیر ڈگیا تخت ہزارا، چڑیاں بول پئیاں
کُجھ بِلھے لِیڑے ہِرکھ دے سِر تے دھر کے نی
اساں چھڈیا دیس پیارا، چڑیاں بول پئیاں
