موڑن والے بیلی مکھ طوفاناں دے

موڑن والے بیلی مکھ طوفاناں دے
ہُندے نہیں شیدائی جھوٹھیاں شاناں دے

سوچ سمجھ کے آکھیں، جو کجھ کہنا ایں
مڑ واپس نہیں آؤندے تیر کماناں دے

کوئی نہ پُچھے حال غریب نمانے دا
خان پراہنے ہندے ایتھے خاناں دے

شملہ اُچا ہندا انکھاں والیاں دا
شیش کدی نہیں جھکدے شیر جواناں دے

بستی بستی خون دے چھپڑ لگے نے
رنگ بدل دے کیوں نہ اج اسماناں دے ؟

دکھ راحیل کسے دا کوئی ونڈدا نہ
دل کیوں پتھر ہو گئے نے انساناں دے ؟