اسیں چوہڑے سانسی واں
ساڈی گیتا نہ قرآن
نہ ای کعبے وچ ساڈی ڈھوئی
نہ ای گنگا وچ اشنان
اسیں بھیل ملیچھ چمار
ساڈی وسیوں جنگل بار
ساڈی جگ نال سانجھ نہ سار
ساڈی پکھیاں پتنوں پار
اسیں باگھے دے کم ذات
دینیہ چنگا نہ ساڈی رات
ساڈا جگ وی جوٹھ اے کھاج
ساڈے کتڑے مال تے داج
ساڈے جلیاں وچ کتیک
اساں سانجھی ازلاں تیک
اساں پیتی میل انگھال
اسیں ننگے پیرے بے حال
ساڈا پنڈ نہ کوئی تھیہ
ساڈا جمنا مرنا کھیہ
ساڈا پچھن دسن کیہ
ساڈا اجڑن وسن کیہ
ساڈی چتا نہ کوئی گور
ساڈے دُکھڑے ہور دے ہور
اسیں نہ جیندے نہ موئے
اسیں نیچ جہان تھیں ہوئے
ساڈی سائیں ونڈ چاکیتی
اسیں بُھل گئے پاک پلیت
(اچھوتاں لئی اک نظم)
