جیون پل دو پل تے نئیں نا
ایہہ دریا دی چھل تے نئیں نا
پاندھی تیہہ مٹا سکدے نیں
وہندا کھوہ ہاں ڈّل تے نئیں نا
بھارے اتھرو ڈگ پیندے نیں
اکھاں وچ کوئی ٹھل تے نئیں نا
شہر اچ کدرے مل سکنے آں
شہر اے مارو تھل تے نئیں نا
رُکھ آں، سُکیا کم آواں گا
میں کوئی سُّکی ول تے نئیں ناں
ہن تے ملنا ایں گل رکھن لئی
پہلے ورگی گل تے نئیں نا
ساڈا ا کّو وعدہ ہونا ایں
ایہہ تیری اج کل تے نئیں نا
وا پُرے دی اپنی تھاں تے
ایہہ پکھیّ دا جھل تے نئیں نا
زندہ رہنا اوکھا کم ایں
مرنا وّڈی گل تے نئیں نا
آجا مل کے لبھیۓ دونویں
اک دوجے دے ول تے نئیں نا
