رُکھّ اک دو ہی پالن جوگے رہِ گئے نیں
باقی سبھ تے بالن جوگے رہِ گئے نیں
ہاسے جیہڑے ونڈدے ہیسن لوکاں نوں
آپو دکھڑے جالن جوگے رہِ گئے نیں
دنیا دے غم مکّ گئے نے پر تیرے دکھّ
میریاں ہڈیاں گالن جوگے رہِ گئے نیں
راتیں ٹھردے پنڈے کِسراں سیکاں گے
اک دو تیلے بالن جوگے رہِ گئے نیں
میریاں پلکاں اُتے جنے اتھرو نیں
سبھ شعراں وچ ڈھالن جوگے رہِ گئے نیں
ہن خُشیاں نہیں ساڈے سینے ٹھاردیاں
سینے صرف اُبالن جوگے رہِ گئے نیں
کون سنے گا گلاں آصف راز دیاں
لوکی ہن تے ٹالن جوگے رہِ گئے نیں
