کھوجی

اسیں مطلب لبھ لبھ تھک جاندے
مطلب لبھ جاون دی خوشی تے نشہ
ہر ہر لحظہ اپنا مطلب دیندا اے
پہلے مطلب دا مطلب
دُوجے پل لئی بے مطلب
پر فیر وی
ہر مطلب ساتھوں اِک عقیدے دی منگ کردا اے
تے اسیں ہتھ بدھے مُجاوراں وانگوں
اپنا سارا ایمان عقیدہ حاضر کردے آں

کیہڑا مطلب سچا
تے کیہڑا مطلب کُوڑا؟
کیہدی ہمت آن نِتارے
منطق موجب دوہویں سچے تے دوہویں جھوٹھے
تے فیر اسیں آن کھلوندے
خالی ہتھ فقیراں وانگوں
سانجھاں تے محتاجی پاروں

سانجھاں دی محتاجی
محتاجی دی پہلی پیڑھی
پر سانجھاں دی اپنی منگ ہوندی اے
بوہتا کجھ قربانی کرنا
جیہڑا کئی کئی رت جگیاں
تے کئی کئی اوکھے پینڈیاں مگروں لبھدا

تے فیر جے ایہہ بھار اوی چک لویئے
پئی سانجھ دے سودے
کجھ ہور گنوانا
تے فیر سانجھاں دا سنگ
کیہڑا ابدی دارُو
جنم جنم دی تس دا
اسیں تھک وی جاندے آں
تے فیر سنگ دا مطلب کیہ اے
ہر پل لئی سنگ دی اپنی منگ
تے دُوجے پل دُوجا سنگ
تے دُوجی لوڑ

تے فیر سنگ اے
شاماں دا
سویراں دا
دریاواں دا
ہواواں دا
سمندراں دا
پہاڑاں دا
صحراواں دا
تے اِس سنگ دا کوئی ناں نہیں
کوئی مطلب نہیں
کوئی منگ نہیں
ہر لوڑ دا دارُو
ہر تھوڑ دا دارُو

اُنج سجنوں میں تہاڈے پیاراں دا کھوجی آں
مینوں تہاڈے پیار دی حقی لوڑ اے

(سنگا پُور)