نویں رون والی کندھ

مسجد اقصی دے احاطے وچ اک کندھ جِتھے ساری دنیا دے یہودی آکے اک مذہبی فریضے وانگوں روندے نیں

اسرائیل وچ غزا تے دوجیاں حصیاں وچ شہید ہوئے فلسطینی بالاں لئی.

جو کجھ تہاڈے من وچ آوے کہہ لوو
فلم تھیٹر یا کجھ ہور
روون والی کندھ دے اگے لگیاں ہوئیاں
بندیاں دیاں بے انت قطاراں
رنگ برنگ نسلاں
وکھو وکھ رہتل تے ریتاں
پورے جگ چوں ٹُر کے آئے
اک حج زیارت فرض فریضے پاروں
او فریضہ جس توں لڑھ چھڑا نہیں سکدے
ایہہ اوس تاریخ دی دین اے
جس دے نال ایہہ سارے بدھے
ایس کندھ اگے اتنے ہنجوں وگے ہن
کہ جے کر سارے اکٹھے کریئے
بندی جھیل بائیکال
یا فر کوئی لال سمندر جتنا ساگر

تے جے کر ایہہ سبھ اتھرو
بڈھڑے امبر توں بارش بن کے وسن تے
جگ سارے وچ ہڑ آ جاسی
ایہہ رون اک فرض فریضہ
دِسدی بڈھڑی ریت، تاریخ
کہ اک واری اک بندہ مصری تخت تے بہہ کہ کہندا سی
کہ جو بچہ اوہنوں رب آکھن توں نا بر ہوسی
اوہنوں جگ وچ ساہ ست رکھن دی مناعی
پر اسیں ویکھیا
نیل ندی نے کچھڑ چا کے
پار لنگھائے
ایس تاریخ دے پہیے نے
کجھ پھیرے لئے ہور
تے ایہہ لگدی پئی کل دی گل اے
تر ے بلانکا، اوس وچ

(ترے بلنکا تے اوس وچ ہٹلر دی نازی سرکار دے اووگار کیمپ جتھے یہودیاں، کمیونسٹاں، پکھی واساں تے ہور دُوجے جمہوریت پسنداں نوں زہری گیس دے چیمبراں وچ پا کے ماریا گیا۔)

لوہے دیاں کنڈیاریاں واڑاں
زہری گیس دِیاں بھٹھیاں
چیکاں ہاڑے ہنجوں تے پکاراں
گدڑ کورا
موت دی فیکٹری
اک پل تے اک جیندا جیندا بندہ
دُوجے پل وچ اک دھکھدا ہویا پنجر
تے تاریخ نے پھیرے لئے کجھ ہور
تے فر ہن ایہہ ساڈے سامنے
اج کھلوتا
فرعونی تخت تے تریبلانکا کیمپ
پر ایہناں دیاں تختیاں بدل گئیاں نے
تے ہن رون والی کندھ نابر اے
اِک وی ہنجوں اپنے سامنے
ڈگاؤن تے
اُتے ہتھ چُک کے انگلی نال اشارہ کردی اے
غازے ول

(اسرائیل دے ناجائز قبضے وچ غازا تے ہور علاقے جِتھے فلسطینی آزادی پسند روز گولیاں کھاندے ہن)

تے شہر مقدس دے لہندے ول
تے کہندی اے
اوتھے رؤن والیاں کندھاں ہن
اج دے دن دِیاں ہنجواں والیاں کندھاں