شام

کالے اتھرُو--کالے ساہ
دُکھ دے ڈھانڈھ
روح دی رات
رُٹھے ہُٹے دِہنہ دا پِھکا ناں
رات دی اکھ دے اتھرو تارے
ڈر دے جھکدے نِکے جاتک
زاہرے ہاسے
تُرٹے جُثے
رنگ برنگ کاغذ
دھُوں وچ ڈُبے مونہ
سُکے رُکھ
ننگیاں بچیاں مانواں بھیناں
اونتر دھرتی دے سینے تے
انھے بولے گُنگے نیلے بدل ہیٹھاں
کندھاں کندھاں
اُچیاں نینویاں، پٹھیاں، سِدھیاں
ڈھلدی شام دی بُکل ہیٹھاں
لُکیاں ہوئیاں اِہ تصویراں
بڈھری چِٹے جھاٹے والی شام
سُن نی شامے
تیری مُڈھ قدیم شریکنی
لِشکدی ہوئی فجر
جیہدا اِک جیندا چمکارا
تیری بُکل پاڑ سٹیسی
تیرا کالا جادو کِرچی کِرچی تھیسی
تے دھرتی دے سینے اُتے
اِہ تصویراں، کِھنڈر وَیسن
آپنے ناں تے شکل وٹیسن
ہولی ہولی دھمدیئے شامے
بڈھڑیئے چِٹے جھاٹے والئیے شامے
نچ لَے
حالے فجر دا پینڈا لما