الف سلکھنا
ب ہیٹھ ہک نکتہ
اساں سنیا
سن کے نہ بولے
ساڈے کن توں جبھ دے رستے وچ
اک وِتھ ہاہی
وِتھ وی ڈر ورگی
اس ڈر توں بولے ہوگئے ہاں
الف سلکھنا
ب ہیٹھ ہک نکتہ
اساں پڑھیا
پڑھ کے نہ لکھیا
ساڈے ہتھیں کڑیاں لگیاں نے
جے لکھیئے قلماں چلدیاں نے
ساڈے لیکھاں وچ جو لکھیا اے
اوہ لکھیا بدلیا جانا اے
الف سلکھنا
ب ہیٹھ ہک نکتہ
اساں لکھیا
لکھ کے پئے سوچی
ایہ نکتے جس تھاں لگدے نے
اوتھوں اکھر داغی ہوندے نے
جد اکھر داغی ہوندے نے
مڑ لکھتاں سچیاں راہندیاں نہیں
الف سلکھنا
ب ہیٹھ ہک نکتہ
اساں سنیا پڑھیا لکھیا اے
اسیں سندے پڑھدے لکھدے ہاہے
ساڈے کنیں سیسہ بھریا اے
ساڈی جبھ تے چھلہ چڑھیا اے
ساڈے ہتھاں نوں ہتھکڑیاں نے
ساڈی سوچ تے پہرے بیٹھے نے
اسیں گونگے بولے جمدے نہیں
سانوں قلم چلانی آوندی اے
پر لکھتاں مڑ وی ادھیاں نے
جیویں مشکاں ساڈیاں بدھیاں نے
اسیں سن سکدے ہاں، سن دے نہیں
اسیں پڑھ سکدے ہاں، پڑھدے نہیں
اسیں لکھ سکدے ہاں، لکھدے نہیں
اسیں اپنی بولی سکھدے نہیں
اسیں ماں بولی دے دشمن ہاں
سانوں دھاراں مانواں نہ بخشن
سانوں دھرتی میل وی نہ دیوے
اسیں مائٹر ہو کے رل جائیے
ساڈا رل کے مرنا بن دا اے
