کَلےدی کرونبلی

تیری اکھ کاسنی دی گل نہیں ہلاونی
نی اساں تیرے بُت دی اے چھِکی تصویر نی
چھِکی تصویر نی

ایہ بوہڑ دیاں پتراں دے مُڈھاں نال گوہلڑاں نوں کھا کے پکھیرواں وٹائی جدوں چوگ نی
تے اودراں دے ماریاں پکھیرواں ویچاریاں دی چُنج اُتے گیت سی
چُنج اُتے گیت سی

ایہ تیری سوہنی ٹور دے
نی سَرو دیاں بوٹیاں دے لَک دے ہُلاریاں نے جان کڈھ لئی اے
نی جیٹھ دے مہینے وچ اُڈدے کبوتراں دی
اُڈدے کبوتراں دی

اکھ پڑھ لئی اے نی جنہاں تیرے روپ نوں اے سُفنے چ تکیا
نی کھِڑے ہوئے مُکھڑے توں اِنج پیا جاپدا کہ سوکے دیاں ماریاں نی فصلاں نوں لگیا اے پانی جویں نہر دا
پانی جویں نہر دا

نی پوہ دے مہینے وچ ساری رات جاگ کے تے چودھویں دے چن نال گلاں رہوے کردا
نی سینے تے سَوا کے سویر دی اُڈیک وچ
سویر دی اُڈیک وچ

کٹّے نے اُنیندرے ایہ اکھاں دیاں لالیاں دیاں ثبوت میرے کول نے
ثبوت میرے کول نے

باسمتی چاولاں دی باس جدوں کھِلرے تے آنڈھیاں گوانڈھیاں دے ہاں جاوے چیردی
کسے مُٹیار دے سَنگھ وچوں لِہندیاں اوہ پولیاں گِرانہہ وانگوں تیرے سوہنے ہاسیاں دی گاہ پئی ہوئی اے
گاہ پئی ہوئی اے

نی تیرے نال ٹُردے اوہ بولدے پچھاویں دی
نی جیس دے دیدار لئی آہلنے چوں ڈِگ کے تے بوٹ مر گئے نے
بوٹ مر گئے نے

اوہ چِڑیاں نِمانیاں دے
سپّاں دیاں شوکراں توں ڈریاں سی جیہڑیاں
ہِرکھاں دی ماری ایس تتڑی اُڈیک ساڈے دل دی بھڑاس نوں اے ہاواں نال ٹھاریا
ہاواں نال ٹھاریا

نی ساؤن دے مہینے وچ مَستے ایہ بدلاں نے اکھاں دیاں ریتاں نوں اے اِنج دا تروکیا کہ سڑدے پئے تھلاں اُتے میہنہ وَس گئے نے
مینہہ وَس گئے نے

تے راہندھا ایس تھل نوں تریل ٹھار چھڈنایں
ایہ کَلے دی کرونبلی تے تھاں مار چھڈنایں