ترا شکوہ کویں کریئے ؟

ترا شکوہ کویں کریئے ؟
ترا شکوہ تے بندا ای نہیں
ترا دتا رزق مولا دِنے راتیں پئے کھاندے آں کما کے نال ہتھاں دے جویں کوئی ڈھور کھاندا اے اُجاڑا کردیاں ہوئیاں تسلی بھور نہیں ہوندی ازل توں ڈھڈ وگُھتیاں دی ندیدی واچھ دے وچوں طلب دی رال وگدی اے ترا شکوہ تے بن دا ای نہیں

ترا شکوہ کویں کریئے ؟
ترا شکوہ تے بندا ای نہیں
ترے دتے پراناں تے زمانے نال ٹُردے آں
کدی اگے کدی پچھے کدی
وچ دُھوڑ دے رہہہ کے حیاتی نال گُھلدے آں
طرفداری کریندے رہے
کُجا تیرے فرشتے نے کراماً کاتبیناں وی
گناہواں تے ثواباں دی اوّلی کاہنگھ لکھی اے
حیاتی دے لتاڑن دی کدائیں گاہ بھوگ نہیں گھتی
اساڈے نال بیتی تے کدائیں اک حرف نہیں لکھیا
زمانے رول چھڈیا اے حقیراں تے فقیراں نوں
ترا شکوہ تے بن دا ای نہیں

ترا شکوہ کویں کریئے؟
ترا شکوہ تے بندا ای نہیں
مقدراں تے گلے سانوں مقدرراں نال کی لڑنا
مقدر آپ نہیں آوندے
مقدر دیت ہوندی اے
مقدراں نال لڑدے تے حیاتی آوکھ نہ دِسدی
کسے تے بھار نہ ہوندے
کسے دی جوٹھ نہ کھاندے
کسے دے پیر دی جُتی دے تھلے خاک نہ ہوندے
کسے دی گاہل نہ جھلدے
کسے دا کھاج نہ ہوندے
جے نہ جمدی رعایا تے سراں تے تاج نہ ہوندے
کمائیاں ہور کی کردے بھلا جنتاں چ جاون لئی
اساڈا پیٹ پالن لئی مقدراں ساتھ نہیں دتا
غماں نوں موت نہیں آوندی
غماں نوں موت جے آوندی
قبر دے وچ گواہ بن کے مرے پاسے کھلے ہوندے
کدی منکر نکیراں دے سوالاں تے جواباں دے
اجہے خوف نہ ہوندے
جویں ہن خوف کھاندے ہاں
ترا شکوہ تے بندا ای نہیں

ترا شکوہ کویں کریئے ؟
ترا شکوہ تے بن دا ای نہیں
مرے مالک بچا سانوں سوالاں تے جواباں توں
کویں دسیئے حیاتی ایہ کدوں گھٹ اے عذاباں توں ؟
ترا شکوہ کویں کریئے ؟
ترا شکوہ تے بن دا ای نہیں