ساڈی وستی

ساڈی وستی کجھ عرصے توں انج دا پیا ہنھیر
اَکاں اتے امب لگدے نیں ککراں اتے بیر

ساڈی وستی کجھ عرصے توں
لَپ سی جیہڑے ٹوپے بن گئے ٹوپے ہوگئے مَن
جتھے بوہڑیں اُگنا ہے سی اوتھے جم پئے وَن

ساڈی وستی کجھ عرصے توں
کندھوں پار اے میّت ہوندی اُرلے پاسے جَنج
اک پاسے نیں ہاسے ڈُلدے دوجے پاسے ہَنج

ساڈی وستی کجھ عرصے توں
یاراں دے اتبار نوں کھا گئی خودغرضی دی وِتھ
جیہڑا جہندے قابو چڑھیا اوسے لینا چِتھ

ساڈی وستی کجھ عرصے توں
چِٹے دن وچ گھُپ ہنیھرا، راتیں نکلے دھپ
ساڈے گیت وی وَیناں ورگے ڈردیاں وَٹ لئی چُپ

ساڈی وستی کجھ عرصے توں
جتھے ڈھیر بھروسا کریے اوتھوں وجے ڈنگ
نُکرے لگ کے ویکھی جاناں بے رنگی دے رنگ