من پاپاں دی آوی

مَن توں وڈا کافر کوئی نئیں
مَن ہی خاص نمازی
مَن ہی مَیں دا ہوکا لاوے
مَن ہی وڈا قاضی

مَن دی گھوڑی پاپی چڑھدے
تکدے رہندے ناجی
مَن بتاں دا کعبہ اَڑیو
مَن کعبے دا حاجی

مَن دے چُک دا کچا بھانڈا
مَن نوں پار نہ لاوے
مَن دی آوی پکا بھانڈا
تَردا تَردا جاوے

مَن مسیت تے یاراں ملی
اساں پڑھیے کِنج صلاتاں
اوہ مِلے تے اگ دے وضو
سَت پھیرے سَت رکاتاں

من دی جے میں مناں
من دی مُول نہ مناں
منیاں جے من مندا
من دی من کے مناں

من پاپاں دی آوی پَکدے
تُھن بَتُھنے بھانڈے
من پاپاں نوں ٹوکہ ٹُکّے
من کُترا کُترا ٹانڈے

من ترکڑی تِیر تلانویں
فیر وی مارے ڈنڈی
بھاری دھارن دا من بیلی
پاجی کیڈ پکھنڈی

من ممولا گُھتیاں مارے
سدھی اور نہ اُڈے
اُڈدا پنچھی وِچ ہواواں
لگنا باز دے ٹُھڈے

حوالہ: تند تند ترکلہ، اعظم سمور؛ پورب اکادمی؛ صفحہ 16 ( ویکھو )