اگّ وی ہمتوں بہتی دتی

اگّ وی ہمتوں بُہتی دتی، پھر وی بھانڈے پلے رہے
بھامبڑ جہیاں دھپاں وچ وی، میرے لیڑے گلے رہے

دوش دیؤ نہ جھکھڑاں اتے، سر توں اڈے تنبواں دا
کِلّے ٹھیک نئیں ٹھوکے خورے، ساتھوں رسے ڈِھلّے رہے

ایدھر گبھرو لاشاں ڈگیاں، سینے پاٹے ماواں دے
اودھر ٹھیک نشانے بدلے، لگدے تغمیں بلے رہے

میں وی دھی سی ڈولے پاؤنی، سُوہا جوڑا لین گیا
ویکھ کے میری حالت ولّے، ہسدے گوٹے طِلّے رہے

رستہ، پینڈا، ویلا اکو، منزل اتے اپڑن دا
پُٹّن گے تقدیراں بہہ کے، ذرا وی جیہڑے ڈِھلّے رہے

اک دہاڑے بدل وسیا، جشن منایا چودھریاں
جھگیاں دے پھر کئی دہاڑے، بالن چُلھے سِلّھے رہے

ساڈا حال وی پچھن جوگی، اوہناں پلے فرصت نہیں
جنھاں دی تنگ دستی دے لئی، بابا کٹدے چھلے رہے