کدے کدے تاں اِنج وی کرنا پیندا اے

کدے کدے تاں انج وی کرنا پیندا اے
ہتھیں مُہرا کھا کے مرنا پیندا اے

بیچ کے اپنے جُثے دا لہو کدے کدے
آٹے والا پیپا بھرنا پیندا اے

لہو دا ہووے بھاویں دریا بھامبڑ دا
اپنی منزل دے لئی ترنا پیندا اے

کدے کدے تاں مان کسے دا رکھن لئی
چٹے بدلاں نوں وی ورھنا پیندا اے

وچ حیاتی انج دے موڑ وی آؤندے نے
دشمن دا وی پانی بھرنا پیندا اے

جہناں دے گھر بیری بابا اوہناں نوں
کچا پکا روڑا جرنا پیندا اے