وَگناں پیا سواں ڈھولا
چھوڑ نہ دیویں بانہہ ڈھولا
لہراں بھیت دِلے نے کھولے
وَٹے وَٹے اُتے بولے
تَینڈا مَینڈا ناں ڈھولا
وگناں پیا سواں ڈھولا
میں کھوہے تے پانی گئی آں
توں تکیا تے میں ہَس پئی آں
گھر گھر پیا نیاں ڈھولا
وگناں پیا سواں ڈھولا
ڈِنگی پَگ تے اُچا شَملا
دل تک تک کے ہویا کملا
کملے آں کِنج سمجھاں ڈھولا
وگناں پیا سواں ڈھولا
آس دِلے نی تولا ماسا
بیر بھلاؤ تَینڈا ہاسا
اپنی گَل نہ گماں ڈھولا
وگناں پیا سواں ڈھولا
دنیا پل پل رنگ وٹائے
دُھپ غماں نی چڑھنی آئے
کر شَملے نی چھاں ڈھولا
وگناں پیا سواں ڈھولا
