میں اپنی میں مارن لگ پئی

میں اپنی میں مارن لگ پئی
جِتدی جِتدی ہارن لگ پئی

پڑھ پڑھ جھوٹھے جگ دا مُکھڑا
جھوٹھ تے سچ نتارن لگ پئی

اپنا نانواں بُھل بُھلا کے
اوہدا نام چتارن لگ پئی

جے نہیں آؤنا زُلفاں والے
مُڑ کیوں زُلف سوارن لگ پئی

دل دے لہو وچ ڈوبا لا کے
غزل دا رُوپ شنگارن لگ پئی

عشق دے اک ستارے اُتوں
چن تے سورج وارن لگ پئی

اپنے نین تے نقش مٹا کے
اوہدے نقش اُبھارن لگ پئی

بیاء آس دی ڈھیری ڈھا کے
فر کیوں واٹ نہارن لگ پئی

حوالہ: اپنے توں ڈر لگدا ( ویکھو )