ہُن کِس تھیں آپ چُھپائی دا

ہُن کِس تھیں آپ چُھپائیدا

کِتے مُلّاں بانگ بُلیندے ہو
کِتے سُنّت فرض دسیندے ہو
کِتے رام دُہائی دیندے ہُو
کِتے متّھے تِلک لگائیدا

ہُن کِس تھیں آپ چھپائیدا

"میں" میری ہے کہ تیری ہے
ایہہ انت بھسم دی ڈھیری ہے
ایہہ ڈھیری پِیا نے گھیری ہے
ڈھیری نُوں ناچ نچائیدا

ہُن کِس تھیں آپ چھپائیدا

کِتے بَینسر چُوڑا پاؤ گے
کِتے جوڑا پا ہنڈھاؤ گے
کِتے آدم حوّا بن آؤگے
کدی میتھوں بی بُھل جائیدا

ہُن کِس تھیں آپ چھپائیدا

باہر ظاہر ڈیرا پایو
آپے ڈھوں ڈھوں ڈھول بجایو
جگ تے اپنا آپ جتایو
پھر عبداللہ دے گھر دھائیدا

ہُن کِس تھیں آپ چھپائیدا

جو بھال تُساڈی کردا ہے
مویاں توں اگے مردا ہے
مویاں بھی تیتھوں ڈردا ہے
مَت مویاں موڑ کوہائیدا

ہُن کِس تھیں آپ چھپائیدا

بِندرا بن میں گئواں چراوے
لنکا چڑھ کے ناد وجاوے
مکّے دا بن حاجی آوے
واہوا رنگ وٹائیدا

ہُن کِس تھیں آپ چھپائیدا

بِندرا بن میں گُئواں چراوے
لنکا چڑھ کے ناد وجاوے
مکے دا بن حاجی آوے
واہوا رنگ وٹائیدا

ہُن کِس تھیں آپ چھپائیدا

منصور تُساں تے آیا ہے
تُساں سُولی پگڑ چڑھایا ہے
میرا بھائی بابل جایا ہے
دیو خون بہا میرے بھائی دا

ہُن کِس تھیں آپ چھپائیدا

تُسِیں سبھنیں بھیسِیں تِھیندے ہو
مینوں ہر جا تسیں دسِیندے ہو
مدھ آپے، آپے پِیندے ہو
آپے کو آپ چھکائیدا

ہُن کِس تھیں آپ چھپائیدا

ہُن پاس تُساڈے وسّاں گی
نہ بے دِل ہو کے نسّاں گی
سبھ بھیت تُساڈے دسّاں گی
کیوں مینوں انگ نہ لائیدا

ہُن کِس تھیں آپ چھپائیدا

واہ جس پر کرم اویہا ہے
تحقیق اوہ بھی تیں جیہا ہے
سچ صحِیح روایت ایہا ہے
تیری نظر مہر تر جائیدا

ہُن کِس تھیں آپ چھپائیدا

وچ بھانبڑ باغ لوائیدا
جیہڑا وِچوں آپ وکھائیدا
جاں الفوں احد بنائیدا
تاں باطن کیا بتلائیدا

ہُن کِس تھیں آپ چھپائیدا

بیلی اللہ والی مالک ہو
تُسیں آپے اپنے سالک ہو
آپے خلقت آپے خالق ہو
آپے امر معروف کرائیدا

ہُن کِس تھیں آپ چھپائیدا

کدھرے چور ہو، کدھرے قاضی ہو
کِتے مِنبر تے بہہ وعظی ہو
کِتے تیغ بہادر غازی ہو
آپے پر کٹک چڑھائیدا

ہُن کِس تھیں آپ چھپائیدا

آپے یوسف قید کرایو
یونس مچھلی توں نگلایو
صابر کیڑے گھت بہایو
پھر اوہناں تخت چڑھائیدا

ہُن کِس تھیں آپ چھپائیدا

بُلھا ہُن صحیح سنجھاتے ہو
ہر صورت نال پچھاتے ہو
کِتے آتے ہو، کِتے جاتے ہو
ہُن میتھوں بُھل نہ جائیدا

ہُن کِس تھیں آپ چھپائیدا

بُلھا! میں شوہ ول مائل ہاں
جھب کرو عنایت سائل ہاں
ایہہ سائل کیہ؟ میں گھائل ہاں
گھائل توں آپ چُھپائیدا؟

ہُن کِس تھیں آپ چُھپائیدا