اِک الف پڑھو چُھٹکارا اے
اِک الفوں دو تِن چار ہوئے
پِھر لکّھ کروڑ ہزار ہوئے
پِھر اوتھوں باجھ شمار ہوئے
ہِک الف دا نُکتہ نیارا اے
اِک الف پڑھو چھٹکارا اے
کیوں پڑھنا ایں گَڈ کتاباں دی
سِر چانا ایں پَنڈ عذاباں دی
کیوں ہویاں شکل جلاداں دی
اَگے پینڈا مشکل بھارا اے
اِک الف پڑھو چھٹکارا اے
بن حافظ حِفظ قرآن کریں
پڑھ پڑھ کے صاف زبان کریں
پر نعمت وچ دھیان کریں
من پِھردا جِیوں ہَلکارا اے
اِک الف پڑھو چُھٹکارا اے
بُلّھا بی بوڑھ دا بویا سی
اوہ بِرچھ وڈا جا ہویا سی
جد بِرچھ اوہ فانی ہویا سی
پھر رہ گیا بی اکارا اے
اِک الف پڑھو چُھٹکارا اے
حوالہ: آکھیا بلھے شاہ نے؛ محمد آصف خان؛ پاکستان پنجابی ادبی بورڈ لاہور؛ صفحہ 72 ( ویکھو )
