تیرے عشق نچایا

تیرے عشق نچایا کرکے تھیّا تھیّا

تیرے عشق نے ڈیرا، میرے اندر کیتا
بھر کے زہر پیالہ، میں تاں آپے پیتا
جھبدے بوہڑِیں وے طبیبا، نہیں تے میں مر گیاں

تیرے عشق نچایا کرکے تھیّا تھیّا

چھپ گیا وے سُورج، باہر رہ گئی آ لالی
وے میں صدقے ہوواں، دیویں مُڑ جے وکھالی
پیرا! میں بھل گئی آں تیرے نال نہ گئی آ

تیرے عشق نچایا کرکے تھیّا تھیّا

ایس عشق دے کولوں، مینوں ہٹک نہ مائے
لاہُو جاندڑے بیڑے، کیہڑا موڑ لیائے
میری عقل جو بُھلّی، نال مہانیاں دے گئی آ

تیرے عشق نچایا کرکے تھیّا تھیّا

ایس عشقے دی جھنگی وچ مور بولیندا
سانوں قبلہ تے کعبہ، سوہنا یار دسِیندا
سانوں گھائل کر کے، پھیر خبر نہ لئی آ

تیرے عشق نچایا کرکے تھیّا تھیّا

بُلھّا شَوہ نے آندا، مینوں عنایت دے بُوہے
جس نے مینوں پوائے ، چولے ساوے تے سُوہے
جاں میں ماری ہے اَڈّی، مِل پیا ہے وہیّا

تیرے عشق نچایا کرکے تھیّا تھیّا

بلھے شاہ دی ہور شاعری

• ⟩  اب لگن لگی کیہ کریے
• ⟩  اُلٹے ہور زمانے آئے
• ⟩  اُٹھ جاگ گُھراڑے مار نہیں
• ⟩  اُٹھ گئے گوانڈھوں یار
• ⟩  اِک الف پڑھو چُھٹکارا اے
• ⟩  اِک رانجھا مینُوں لوڑِیدا
• ⟩  اِک نقطے وچ گل مُکدی اے
• ⟩  آ مِل یار سار لے میری
• ⟩  آؤ سیّو رل دیو نی ودھائی
• ⟩  اپنا دسّ ٹِکانا
• ⟩  بلھے شاہ دی ساری شاعری