دُکھاں دی ہڑتال اے اج کل حیرت ہے

دُکھاں دی ہڑتال اے اج کل حیرت ہے
سُکھ بنیا گھڑیال اے اج کل حیرت ہے

ہر بندے دے کول اے ہاسا ہسن لئی
فیر وی اوہ بے حال ہے اج کل حیرت ہے

جیہڑا سانوں دوروں ویکھ کے راضی نئیں سی
اوہ وی ساڈے نال اے اج کل حیرت ہے

جھوٹا، لچا ہر تھاں سب توں اُچا ہے
سچ کہنا وی گال اے اج کل حیرت ہے

کل تک دال چہ کالا سُن دے ہندے سی
کالی ساری دال اے اج کل حیرت ہے

ہر بندے دے ذہن چہ دوجے بندے لئی
پُٹھی سدھی چال اے اج کل حیرت ہے

میں کلی نئیں روندی خون دے رشتیاں نوں
گھر گھر ایہو حال اے اج کل حیرت ہے

جنہوں بشری انگلی پھڑ کے ٹرنا دسیا
اوہدی اکھ چہ دال اے اج کل حیرت ہے