ਵਿਹੜੇ ਦੇ ਵਿਚ ਇਕ ਦਿਨ ਆਇਆ ਸੰਗਦਾ ਸੰਗਦਾ ਇਸ਼ਕ
ਮੈਂ ਪੁੱਛਿਆ ਤੇ ਆਖਣ ਲੱਗਾ ਮੈਂ ਆਂ ਝੰਗ ਦਾ ਇਸ਼ਕ
ਸਿਖ਼ਰ ਦੁਪਹਿਰੇ ਨੰਗੇ ਪੈਰੀਂ ਮੌਜ ਚਿ ਲੁੱਡੀਆਂ ਪਾਉਂਦਾ
ਅੱਜ ਮੈਂ ਆਪਣੀ ਅੱਖੀਂ ਤੱਕਿਆ ਇਕ ਮਲੰਗ ਦਾ ਇਸ਼ਕ
ਅੱਖਾਂ ਵਿਚ ਲਿਸ਼ਕਾਰੇ ਮਾਰੇ ਮੁੜ ਮੁੜ ਉਹਨੂੰ ਤੱਕਾਂ
ਕਾਲੇ ਰੰਗ ਤੇ ਬੋਰਡ ਤੇ ਲਿਖਿਆ ਚਿੱਟੇ ਰੰਗ ਦਾ ਇਸ਼ਕ
ਹੋ ਸਕਦਾ ਏ ਨਿੱਭ ਜਾਵੇ ਪਰ ਡਰ ਲਗਦਾ ਏ ਸੁਣ ਕੇ
ਪੱਥਰਾਂ ਨਾਲ਼ ਤੇ ਨਿੱਭ ਨਹੀਂ ਸਕਦਾ ਕੱਚੀ ਵੰਗ ਦਾ ਇਸ਼ਕ
ਇਸ਼ਕ ਇਸ਼ਕ ਦਾ ਰੌਲ਼ਾ ਪਾਉਣਾ ਚੰਗੀ ਗੱਲ ਨਹੀਂ ਮੁੜ ਜਾ
ਇਹ ਵੀ ਚੇਤੇ ਰੱਖੀਂ ਬੁਸ਼ਰਾ ਸੂਲੀ ਟੰਗਦਾ ਇਸ਼ਕ
