691
"کیہ توں انھا؟ کیہ گنگا ڈورا؟ مونہوں بلیندا ناہیں
ایہے کون سیانا جوگی ؟ مونہہ بدھا پھرے کوائیں ؟
کیہ توں سحری ؟ کیہ چپ کتیا ، بجھ سکاہاں ناہیں "
آکھ دومودر کاہل ہوئیاں ، ویہلا دس اساہیں
692
پھر مالا ہتھ لیتی جوگی، منکے پرت سٹیندا
کاوڑ نال کرے سبھ شارت ، مونہوں نہ مول الیندا
لاپ جوار دواہاں تینوں ، کیوں نیہے سون سنیندا
آکھ اساں سچ، دے سنیہا ، پھر پھر ہتھ مریندا
693
تاں کڑیاں بول سنیہے دتے ، پچھوں جوگی آیا
آئی واؤ ابھے دی اساں ، تساں مشک نہ آیا؟
ڈٹھو صحیح ، سنجھان پچھاتا، ہور سو نہیں ، کر پایا
ہسی آکھیا جوگی نیہے ، ایہہ آپ رنجھیٹا آیا
694
جان سنجھاتا ، سبھناں سئیاں، گئیاں چمڑ توائیں
صحیح سچ جاتو نیں دھیدو ، مونہوں بلیندا ناہیں
کوئی پیریں کوئی ہتھیں ، کوئی جنگھاں ، کوئی باہیں
کوئی پچھے ، کوئی اگے ، کوئی ویکھن تائیں
آکھ دمودر کیہی رونس ، جن منگن موہو ماہی
695
پچھن دکھ ، حقیقت آکھن ، روون کڈھن آہیں
"اساں وسار بیٹھوں ، سن صاحب ، چت آئیاں ناہیں ؟
جوگی ہور نہ کیتو پھیرا، اسیں اوہو آتن آہیں"
آکھ دمودر نپ آندونیں ، جتھے ٹاہلی دھواں آہی
696
چریں وچھنیاں ، دکھ پھولیندیاں، بوہت ویراگ کیتونیں
دکھ پرانے ظاہرکیتے آنیں ، دھیدو بے بہیو نیں
مجلس رج کیتی سیالیں ، ایہو فکر کیتو نیں
آکھ دمودر صحیح سیالیں ، رانجھے نوں آکھیو نیں
697
"ہووے حکم اکھاہاں تینوں ، جے تینڈے من بھاوے
جال اتھائیں ، گوئل کیچے، آتن آکھ سناوے
اوہو بیڑی تے اوہو بیلا ، آتن پل پاوے
آکھ دمودر جال اتھائیں ، اساں بوہت ہتاوے
698
"سن ہسی ! میں کیکر جالیں ، ایہہ دل لگدا ناہیں
ہیرے باجھوں ، کل ہنیرا ، کجھ دسیندا ناہیں
رگ رگ دے وچ ہیر سمانی ، ہور نہ کو اشنائی
آکھ ہسی ، ویندا ہاں کھیڑیں ، کیہ بھاوے کھسمے تائیں "
699
"سن بھیدو ! ہک عرض اساڈی ، کت کوں اگے ویندا؟
توں اوہو رانجھا تے اسیں اوہو کڑیاں ، کیوں نہیں گل منیندا
بوہت اڈیک تساڈی میکوں ، ہن نیہیں رہن کریندا
آکھ دمودر نہیں تاں آتن نالے تیرے ویندا"
700
"سن ہسی ! سر رکھ تلی تے ، میں ہیرے دھر آیا
جیوندے جی ، مینڈی تانگھ تیرے ول ہن میں آپے آیا
وس نہ مینڈا چلے ادائیں ، حکمی پکڑ چلایا
کیکن رہاں سیانی ہسی چت سیالی ہیر پھہایا"
