ربّا سچیا توں تے آکھیا سی

ربّا سچیا توں تے آکھیا سی
جا اوئے بندیا جگ دا شاہ ہیں تُوں
ساڈیاں نعمتاں تیریاں دولتاں نیں
ساڈا نیب تے عالی جاہ ہیں توں

ایس لارے تے ٹور کد پُچھیا ای
کِیہ ایس نمانے تے بیتیاں نیں
کدی سار وی لئی او رب سائیاں
تیرے شاہ نال جگ کیہ کیتیاں نیں
کِتے دھونس پولیس سرکار دی اے
کِتے دھاندلی مال پٹوار دی اے

اینویں وچ ہڈاں کلپے جان میری
جیویں پھائی وِچ کُونج کرلاوندی اے
چنگا شاہ بنایا ای رب سائیاں
پَولے کھاندیاں وار نئیں آوندی اے

مینوں شاہی نہیں چاہی دی رب میرے
میں تے عزتاں دا ٹکر منگنا واں
مینوں تاہنگ نئیں محلاں ماڑیاں دی
میں تے جیونے دی نُکر منگنا ہاں

میری منیں تے تیریاں میں منّاں
تیری سونہہ جے اِک وی گل موڑاں
جے ایہہ منگ نئیں پُجدی تَین ربّا
فیر میں جاواں تے رب کوئی ہور لوڑاں

حوالہ: رات دی رات, فیض احمد فیض; صفحہ 15 ( ویکھو )