جدوں کیتیاں صفتاں میں وچّ وحشت

جدوں کیتیاں صفتاں میں وچّ وحشت
تیریاں مست چشماں بی مثالاں دیاں
جنگل وچ شرموں سر سٹّ نیویں
آئیاں ٹولیاں وچ غزالاں دیاں

رہی قدر یاقوت مر جان دی نہ
تیریاں لباں دے یار مقابلے تے
گھٹیا وکری نہ رہیاں قیمتاں اوہ
دنیا وچ بدخشاں دے والاں دیاں

مالدار بدخشاں دے رہن والے
اتے یمن دے ملک دے کلّ جوہری
تیرے حالَ سنہری نوں ویکھ کے تے
مارن شیخیاں نہ زراں مالاں دیاں

تیریاں گوہڑیاں نیناں دے وچ جانی
ڈورے لال نے ساڈیاں مستیاں دے
کسے عاشق دے دل نوں پھسان دے لئی
تنیاں کسیاں نے خونی جالاں دیاں

جہیاں مورچے بندیاں کیتیاں نے
رخ تیک ناں زلفاں نوں آؤن دیوے
یار ملک تاتار دے فوجیاں نے
جُٹاں بنھیاں نے تیرے خالاں دیاں

ہوون نہ مجبور منصور وانگوں
شوق نال جا کے چڑھن آپ سولی
نظر باز عاشق جے کر ویکھ جاون
نوکاں تیریاں پلکاں دے والاں دیاں

کرے کویں زلیخا نہ رشک یارو
عشقَ وچ میری حالت ویکھ کے تے
اوہدے سامنے نیویاں رہندیاں نے
شوق اکھیاں یوسف جمالاں دیاں

متھا، رخ، وینی، زلف، خال، ٹھوڈی
ایہہ بے مثل میرے بے مثال دے نے
جے کر دواں وی تے کاہدے نال دیواں
میں مثلاں یارو بےمثالاں دیاں

رشکے خضر سکندر دے نال میریاں
پریشانیاں دی کوئی حد ناہیں
تیری زلف دی یاد وچ مکدیاں نہیں
راتاں لمبیاں کھان جنجالاں دیاں

متھا وٹّ کے ایویں بےمطلب ہی توں
گلّ گلّ اتے رٹا پا بہنے
دسّ یار میں کس طرحاں سمجھاں تینوں
تیریاں عادتاں نے بالکل بالاں دیاں

قدر پھلاں دی ہندی اے بلبلاں نوں
جوہری پرکھ جواہراں دی جاندے نے
ایہہ 'فقیر' بھلا قدراں ہون کیوں نہ
قدرداناں نوں میرے خیالاں دیاں