مولٰی خدا دے نور دی نوری ضیاء تسیں

مولٰی خدا دے نور دی نوری ضیاء تسیں
پچھوں خدا دے ہو تسیں جے نہیں خدا تسیں

مستی اے جیہدے مدّ دی توحید دا سرور
فطرت دے بانکپن دی ہو بانکی ادا تسیں

راہ وچ تساں دے ملدیاں اگوں دی منزلاں
رہبر بنن، بنوں جنہاں دے رہنما تسیں

رستے وکھائی شر نوں تساں خیر دے ہمیش
کردے ہو بُریاں نال ہمیشہ بھلا تسیں

دیندے ہو بدلہ ظلم دے باہرو نوں حلم دا،
کردے ہو بدزبان لئی مولٰی دعا تسیں

خوشیاں بناوندے ہو غماں ماریاں دے درد،
لیندے ہو دکھ دکھیاں دے سارے ونڈا تسیں

چڑھدے ہڑاں دے زور دی چڑھتل تروڑ کے،
دندے ہو بیڑے ڈولدے نوں پار لا تسیں

حلّ مشکلاں دے قول نے کیتے جناب دے
مولا تسیں جہان دے مشکل کشا تسیں

کردے اس آدمی تے فرشتے وی حسد نے
جس آدمی نوں دیندے ہو بندہ بنا تسیں

سلطان کرن مان تہاڈی گدائی دا
ٹورو بنا کے بادشاہ آئے گدا تسیں

جھکیا فلک زمین تے رہے تاریاں سمیت
آندے ہو پرت پل وچ عرشاں تے جا تسیں

وسدے دھروں پئے وچ اجاڑاں دے شہر نے
پاوو ایہناں تے جھات جے کارے قضاء تسیں

وت بخشدے ہو پانی دے قطرے نوں بحر دا
دیندے او کدی زرے نوں سورج بنا تسیں

سبھ نال کیتیاں نے رواداریاں تسیں
نہیں گلّ کردے کوئی کدی ناروا تسیں

دیندا اے کم اوہ کلھابندی دے کوٹ دا
مکڑی نوں جے کتے لوو جالا تنا تسیں

چھڑدا اے راگ درد محبت دے ساز دا
تاراں اوہ دل دیاں جدوں دیندے ہلا تسیں

کر پار لاؤ نور دے پتن تے بیڑیاں
ظلمت دے بحر دے ہو ایسے ناخدا تسیں

سایہ کوئی نہ اپنے قامت دا ہندیاں
رحمت دے سائبان ہو وچ دوسرا تسیں

جیوندے نے مردے عیسیٰ مسیح دے دموں فقیر
عیسیٰ مرے تے لیندے ہو اوہنوں جیوا تسیں