نکلے آپ مہاڑ جے کدی بنے

نکلے آپ مہاڑ جے کدی بنے
اسیں عشقَ دی اٹھ جناب وچوں
سانوں نال لے جان لئی آپ آئیاں
اوہدیاں سینتاں نکل نقاب وچوں

اوسے دن دا پیتیاں باجھ سانوں
چڑھیا نشہ اے کدی نہ لیہن والا
جام پھڑدیاں اک دن ویکھ لئی سی
اکھ ساقی دی جام شراب وچوں

کد تکّ بھرم بنیا رہِ سی وچ عامہ
انج حضور ایہناں پردہ داریاں دا
کدی تاریاں دے وچوں جھاکدے او
ماروں جھاتیاں کدی ماہتاب وچوں

جاپے انج لے گئی سبھ کجھ نال ایہدا
یاد اوہناں دی ایہدے توں جان لگی
دل نوں روز ای پھولدا ویکھداں میں
لبھدا ککھّ نہیں خانہ خراب وچوں

مومن سمجھدے ہون گے فلسفہ ایہہ
ساڈی سمجھ وچ تے گلّ ڈھکدی نہیں
دیندار تائیں جنت لبھنی ایں
کیکن جگّ دوزخ دے عذابِ وچوں

ساڈی خطا دا سلسلہ نال اوہناں
بنیا سلسلہ اے گورکھ دھندیاں دا
نکلے نہ اوہناں دے جواب وچوں
تے نہ ہاں اوہناں دے جواب وچوں

ایویں جالیاں تان دا پھرے باغے
چکی پنجرہ پھرے صیاد ایویں
بلبل لئی ڈوراں بن کے نکلی اے
باس مہکدی پھلّ گلاب وچوں

رکھے غماں نوں شاد آباد مولٰی
ایہناں نال ای دل دیاں رونقاں نے
درس خوشی دے ملن میں جدوں تھلاں
ورقہ غماں دا دل دی کتاب وچوں

ایہناں دین تے دُنی دے جھگڑیاں توں
اﷲ اپنی وچ امان رکھے
نیکی بدی دی بحث وچ پواں میں کیوں
میں کی لینے عذاب ثواب وچوں

ویہڑے وچ مسیت دے اج کیتا
کجھ نمازیاں کم چھڈاونے دا
ہتھو پائی ہندی رنداں صوفیاں دی
ملاں ویکھدا رہا محراب وچوں

منگن باجھ دیندا رہوے روز مینوں
مالک سارے جہان نوں دین والا
ہیٹھی کراں کیوں اوہدیاں رحمتاں دی
لواں منگ مالک دی جناب وچوں

چل وچ پنجاب ایران ولوں
غزل گو شیراز دے آونے نے
گیا جدوں فقیر ایران ولے
میری غزل دا رنگ پنجاب وچوں