سدھر میری جہاد، شہادت میری امنگ

سدھر میری جہاد، شہادت میری امنگ
سن کے لہو ترنگ سنے کون جل ترنگ

چن چڑھیا ویکھ چن تے چڑھدے چکور نے
بلدی شمع نوں ویکھ پچھا نہ ہٹن نہ پتنگ

آؤندے نے مڑ ہوا دے کھڈاری گھڑی گھڑی
گڈے دے نال لڑنیئیں ہن لہریا پتنگ

دساں گا فیر کھیڈ کے مرداں دی کھیڈ میں
کنیں میرے نہ بوندے ہتھیں میرے نہ ونگ

ٹوہ لئی اے اگے بزدلاں میری دلاوری
لئے ویکھ ڈھنگیاں نے میرے حوصلے دے ڈھنگ

یاراں نوں مان ہندا اے یاراں دے ساتھ دا
بندے ہمیش دشمناں دے سنگ نے کسنگ

گھر غیر دے جا اوہناں نے پاؤنی ایں بھنگ کی
گھر اپنے جنہاں دے رہے بھجدی ہمیش بھنگ

ہویا اے دنگ وقت جے چڑھتل میری نوں ویکھ
ہووےگا وقت مڑ میری چڑھتل نوں ویکھ دنگ

کردا اے میرا دم قدم ایہہ سرخرو زمین
چڑھ کے نہ سدا لہندا میرے خون دا ایہہ رنگ

رہندا اوہناں نوں اگے توں ڈنگن دا بل نہیں
لیناں میں جنہاں پھنیئراں سپاں دے کھچّ ڈنگ

جاندا اے بھلّ مینوں وی تے بھیڑیاں دا بھیڑ
رہندا جے بھیڑیاں نوں میرا یاد نہیں چنگ

کنبدے نے میتھوں ظالماں ظلماں دے دبدبے
جگرا اے میرا شیر دا میں حیدری ملنگ

سجن لئی فقیر میں پیغام صبح دا
ویری لئی اے نعرہ میرا جنگ جنگ جنگ