بال لہو وِچ اگ وے اَڑیا

بال لہو وچ اَگ وے اَڑیا
آ سینے نَل لگ وے اَڑیا

دِل تو چوری دل لے نَسیوں
جا بئیمان تے ٹھگ وے اَڑیا

اَکھ اِچ نیلے کچ دا گولا
مُندری دے وِچ نگ وے اَڑیا

دُکھ اِچ اپنیاں کی کیتا ہے
کی کر لینا جگ وے اَڑیا

مان، تران، تے دَان اساڈے
دریاواں دی جھگ وے اَڑیا

خبرے دل وچ کون آ وسیا
پھَڑک پئی رَگ رَگ وے اَڑیا

مُکرنا اِنج کھلوتے پیریں
ہک دودِن تاں تگ وے اَڑیا

پیار تاں سِر دا تاج دیوے
پیریں رول نا پَگ وے اَڑیا

فرحت شاہ جئے کتنے پھِردے
اوہدے دَر دے سَگ وے اَڑیا