مینوں یاداں تیریاں آؤندیاں نیں

جد پنچھی گھر نوں آؤندے نیں
جد عاشق جنگلی بھؤندے نیں
جد پے جائے شام آبادی تے
جد دھونڑی دھخے سمادھی تے
جد رکھ وی چپاں وٹ لیندے
جد تاجر کھٹی کھٹ لیندے
جد بِرہن کوئی روندی اے
جد کھوہ نیناں دے جوندی اے
جد جوبن ہووے دکھاں تے
جد قسمت رسے سکھاں تے
بنڑ تیز کٹاری ایہہ سوچاں
سینے چوں رت چواندئیاں نیں
مینوں یاداں تیریاں آؤندیاں نیں

جد آلی دیوے بلدے نیں
جد درد سونیہڑے گھلدے نیں
جد سوچاں سینے ساڑدیاں
جد سکھ دا ورقا پاڑ دیاں
جد پیڑ کلیجے چڑھ جاندی
دل مندری تے غم جڑ جاندی
جد چمکے چن آسماناں تے
جد نیندر چڑھے ناداناں تے
جد غم دا آوا دکھدا اے
دل درداں دے نال دکھدا اے
فر بیتیاں گلاں بنڑ ہنجو
نیناں چوں نیندر دھؤندیاں نیں
مینوں یاداں تیریاں آؤندیاں نیں

جد کلیاں اکھاں کھول دیاں
جد خشبو باغیں ڈول دیاں
جد پھل ہلارے کھاندے نیں
بلبل نوں ناز وکھاندے نیں
جد بلبل گانڑاں گاندی اے
پھلاں توں واری جاندی اے
جد گیندا مہکاں دیندا اے
جد سیک اے بھورا سہندا اے
جد گلھر روپ وکھیندا اے
سکھ چین ہوا نال کھیندا اے
فر دل وِچ تیری صورت توں
ایہہ سوچاں پردے لاؤندیاں نیں
مینوں یاداں تیریاں آؤندیاں نیں

جد بگلا چھنڈے کھمباں نوں
جد بور سجاوے امباں نوں
جد لگ جاں گوڑاں توتاں تے
جد ریشم وِچھے شہتوتاں تے
جد کوڑی نِمے شھت ہووے
جد بھورا اس دا بیعت ہووے
جد ککراں تے پھل کھل جاندے
کھمرا تے گگھی مل جاندے
جد لکے کٹکن لگ جاندے
جد عطراں دے چو وگ پیندے
فر سوہنڑیاں شکلاں بنڑ ہوکے
سینے وِچ آنڑ سمؤندیاں نیں
مینوں یاداں تیریاں آؤندیاں نیں

جد پِپل دے پت ہلدے نیں
جد پھل تے بھورا ملدے نیں
جد کوئل بولے باگاں دی
جد لہہ جائے کنج ناگاں دی
جد سرو سلامی دیندے نیں
سمبل کی خورے کہندے نیں
ٹالی دے پت محرابی جئے
جد نام سجنڑ دا لیندے نیں
ساہواں دِیاں ڈاراں کیوں خورے
فر تیرے ولے بھؤندیاں نیں
مینوں یاداں تیریاں آؤندیاں نیں

جد پیلاں پاوے مور پیا
جد چشمے ہووے شور پیا
جد چکوی چن ول اڈ جاوے
جد گوری مروا گڈ جاوے
جد جوبن ہوئے بھاراں تے
جد کھلدے پھل اناراں دے
جد ققنس موجی چڑ جاندا
جد اپنڑی اگے سڑ جاندا
جد ہنس ولیویں کھاندے نیں
جد بیلی پیت نبھاندے نیں
جد کاں وی یار کلول کرن
جد طوطے ٹال مٹول کرن
کر یاد وصل دیان رتاں نوں
ایہہ اکھاں چھم چھم رؤندیاں نیں
مینوں یاداں تیریاں آؤندیاں نیں

جد سوچ پٹاری کھل جاندی
جد زہر لہو وچ گھل جاندی
سپ ساہیں شوکن لگ پیندے
جد پچِھے غم دے وگ پیندے
جد جُسّہ نیل و نیل ہووے
جد ناں کوئی وید وکیل ہووے
جد زور نہ چلے ہاواں تے
جد مانڑ رہوے ناں باواں تے
پھر آساں بیڑی ڈوب جیاں
سر اپنڑے مٹی پؤندیاں نیں
مینوں یاداں تیریاں آؤندیاں نیں

جد سدھراں مٹی رلدیاں نیں
جد ہاواں بوھے ملدیاں نیں
جد ساہ وی سینہ ڈنگ جاندے
لے خنجر دل چوں لنگ جاندے
جد ہڈاں چوں مِکھ سڑ جاندی
جِند ہجر کڑاہے چڑھ جاندی
جد روپ سروپ وی بھل جاوے
دل مرنڑ مرانڑے وی تل جاوے
مینوں سڑیا وڑیا ویکھ جدوں
سب سئیاں چنڈ چھڑاؤندیاں نیں
مینوں یاداں تیریاں آؤندیاں نیں

جد غم دا پکھڑا پک جاندا
جد ساہ وی چل چل تھک جاندا
آخر ایہہ سینے رک جاندا
سب آساں دا پھل سک جاندا
جد چلدی نبض کھلو جاندی
دکھاں دی چھٹی ہو جاندی
جد پا پھٹے غسلیندے نیں
پھر فرضی وینڑ کریندے نیں
جد قبرستانیں کھڑدے نیں
تکبیراں چارے پڑھدے نیں
جد تازہ پٹی قبرے تے
کوئی غیراں مٹی پؤندیاں نیں
مینوں یاداں تیریاں آؤندیاں نیں