خوش آمدید!

ایہہ سال ہے بیت رہیا
پلاں تو سیکنڈ، سیکنڈاں توں منٹ
منٹ، گھنٹے، دن
ہفتے تے مہینے
یاداں دی جیوں خوبصورت کڑی
دعاواں ، سفنیاں
مسکراہٹاں تے ہاسیاں
نال رنگے ہوئے پل
ہر یاد تیری
ہر خیال تیرا
ہر سفنا تیرا
ہر دعا تیرے لئی
ہر مسکان تیرے لئی
ہنجو وی تیرے لئی
ہاسے وی تیرے لئی
ہر دھڑکن تیرے لئی
میرے سارے گیت تیرے لئی
میرے ساہ تیرے لئی
میری ہوند تیرے لئی
اس طرحاں دا ہے ایہہ جا رہیا سال
اس نوں الوداع آکھاں
دل نہیں کردا
پر وقت کد ٹھہر دا
وگدے پانی دی دھارا
چلنا ہے زندگی

تیرے مِٹھے مِٹھے ساہ
تیرے نِگھے نِگھے ساہاں نال
میرا لوں لوں مہکیا
کس طرحاں آکھاں ایہو جیہے پلاں نوں الوداع
پر جاندی ہاں
جد نواں سال چڑھے گا
آواز تے مہکاں بھرے بولاں دا سفر تہہ کر

اگ دے سفر تے تُراں گے اسیں
گل لگاں گے
ساری دنیا نوں کلاوے چ لواں گے
تیرا دل، میرا دل گائے گا
کوئی گیت انسانیت دا
تیریاں اکھاں، میریاں اکھاں
زندگی دیاں چوٹیاں ول تکن گیاں
تیرے پیر، میرے پیر
اُچیاں منزلاں ول تُرن گے
تیرے ہتھ، میرے ہتھ
عشق دے مقدر نوں لکھن گے

تیری روح، میری روح
چانن، چانن ہووے گی
تے اس حال وچ اسیں آکھاں گے
نویں سال نوں مبارک باد!
ہُن آوی جا میرے مٹھے دل، میری جان
میری روح
چل اج آپاں کوسے کوسے چُمناں
نال آکھیے نویں ورھے نوں
خوش آمدید!
خوش آمدید!!