سسّی پُنوں

صفحہ 21

مست بیہوش ہویا شہزادہ، رہیا سوال جوابوں
اک نیندر گل بانہہ سسّی دی ڈگیا ہور شرابوں
عاشق ہوون تے سُکھ پاون، ایہہ گل دور حسابوں
ہاشم جن کن راہ عشق دی، کاج گوایا خوابوں

نصفوں رات گئی کرواناں، کرہاں تنگ کسائے
محمل مست بیہوش پنوں، لے شہر بھنبھوروں دھائے
کٹھن، کٹھور، بے ترس، ککرمے یار وچھوڑ لیائے
ہاشم رون کلاون والے، پھیر سسّی دن آئے

نبڑی رات ہویا دن روشن، آن چڑی چچلانی
سورج جان نہیں اوہ جل دی ویکھ چخہ آسمانی
خاطر کرن کباب سسّی دے، مار جدائی کانی
ہاشم آن بنے جس جانے، کیہ گل کرن زبانی

نین اوگھاڑ سسی جد ویکھے، جاگ لئی سدھ آئی
نہ اوہ اوٹھ نہ اوٹھاں والے، نہ اوہ جام صراحی
واحد جان پئی اوہ ناہیں، نال پئی جس آہی
ہاشم توڑ سنگار سسی نے، خاک لئی سر پائی