پرچھاویں دی ونڈ

کھالیوں پار دے پانی وارے، میتھوں جھاڑا لیندیاں پُچھیا
"ویکھنا --- تہاڈے کول کوئی جڑ پکڑن والا بوٹا تے نہیں؟"
میں کیہ دسّاں۔۔۔
جڑھ پَھڑنے، بُوٹے نوں کوئی اُگن توں وی ڈک سکدا اے؟
میری جڑھ وی اُگ آوے گی دھرتی ماں دے سینے چوں۔۔۔
میں وی چھاواں ونڈاں گا۔
کھالیوں پار تے حالے تیک اوہ رُکھ چھاواں ونڈ دے رہندے نیں
جیہڑے میریاں پُرکھاں نیں ہڈاں نوں قلم بنا کے آپوں گڈے سن
جُثے دی رَت پیا کے
ہنجُواں دے پانی لائے سن
ہن اوہ قلماں پنگھر گیّاں نیں
تاہیوں چار چوفیرے ٹھنڈیاں چھاواں نیں۔۔۔
کھالیوں پار میرے پُرکھاں نیں جیہڑے بوٹے لائے سن
جڑھاں اوہنآں دیاں اندروں اندری ٹُردیاں
میرے ویہڑے تیکر آ گیّاں نیں
چھاواں تے خشبوواں میرے ساہواں وچ سما گیّاں نیں
ہن اوہناں نوں اُگن توں اگّے ودھن توں
کیویں کوئی ڈک سکدا اے؟
ورھیاں دی "رل بیتی" چیتے آوندی اے
میری منّو
اِک دُوجے دا ساہ نہ ڈکو۔۔۔ کھج دیاں ایہہ جھاڑاں ساڑو
سانبھو وَرتو قلم پرِیتی رُکھاں والی۔۔۔

پانی وارا دس کھاں مینوں!
جیہڑے پنچھی چُنجاں دے وچ پپلاں تے بوہڑاں دے ڈوڈے
لے کے اُڈدے رہندے نیں۔۔۔ اوہناں نوں کیویں ڈکو گے؟
گھگیاں، چڑیاں، کونج، کبوتر، ہر پنچھی نوں پاسپورٹ بنوان دا آکھو
ویکھنا کدھرے اُڈدیاں اُڈدیاں
اوہ اوس جوہ وچ نہ اُترن جِتھے دا ٹھپہ نہ ہووے
ڈک سکو تے واواں نوں وی بارڈر پار کرن توں ڈکو
ڈکو واورولے ڈکو۔۔
ہوسکے تے بدلاں نُوں وی متّاں دیوو
مینہ نوں موڑو۔۔۔ کِتے پرائی بھوئیں سینے ٹھنڈ نہ پاوے
چن وی ادھا ادھا ونڈو
تنبو تان کے تارے وکھرے وکھرے کرلئو

"ایدھر پار" دا چانن "اودھر پار" نہ جاوے
مٹی دھوڑ نوں ایدھر اودھر ہوون توں ڈکو
جے کر ایہہ نہیں ہوسکدا تے پانی وارا
پنگرن والیاں بوٹیاں نوں رَل پانی لائیے، پریت گلاب اگائیے
تیرا میرا اِک پرچھاواں، اِکو ساہواں دی خشبوئی
ایہہ پر چھاویں ونڈ نہیں ہوندے

کھالیوں پار مرے پُرکھاں نیں جیہڑے بُوٹے لائے سن
جڑھاں اوہناں دیاں اندروں ٹُردیاں
میرے ویہڑے تیکر آگیّاں نیں۔