سوہنا روپ گواچا کیویں سمجھ نہ مینوں آئی
سفنے اندر لنگھی جندڑی ہوش نہ مینوں آئی
جیہڑے میرے نال ٹرے اوہ جاون ونگ وٹائی
کسے وی رنگ نہ کھیڈن دتا اس دی بے پروائی
لوک تے سارے بازی لاون کھیڈن چھپن چھپائی
میں تے وکھری نکر مل کے سجن دی رٹ لائی
سئیاں میتھوں پچھن پئیاں کنج اے جند لٹائی
شوہ نال کسراں ملنی ہوئی کسراں ککلی پائی
جے اوہ ساویں آندا تے فر ہوندی گھنڈ چکائی
پچھے اوہدے ٹردیا ٹردیا ساری عمر وہائی
تن دی وکھری تانی تن کے سر تے گھٹڑی چائی
من دی وکھری درد کتاب میں دوجیاں تھیں لکھوائی
جس دم ہوئی نجمی یارا روح کلبوت جدائی
اک سجن دے نال ملی تے دوجی خاک سمائی
